Երկուշաբթի, 25 Հուլիսի 2022թ. Երբ շշնջում են նաև ափսեները | Նախօրեին Սևանի քաղաքային զբոսայգում տեղի ունեցավ «Շշնջացող ափսեներ» գիտարձանի բացման հանդիսավոր արարողությունը: Հուլիսյան հերթական օրը դարձել էր իրադարձային ոչ միայն գիտարձանի հեղինակի, այլ նաև սևանցիների համար, ու կարմիր ժապավենն էլ հուշում էր, որ համայնքում ավելանում է էլի մեկ հետաքրքիր վայր: Ինչպես նշում է «Շշնջացող ափսեներ»-ի հեղինակ Գայանե Կարապետյանը, նախագծի հիմնական նպատակը գիտության հանրայնացումն է, տվյալ դեպքում ձայնի տարածման հատկությունների բացահայտումը գիտարձանի միջոցով: «Գիտարձանի գաղափարը ծնվեց դեռևս 3 տարի առաջ, երբ ԱՄՆ-ի Սան Ֆրանցիսկո քաղաքում տեսանք ակուստիկ հայելիներ, որոնք պատրաստված էին բրոնզից: Հետագայում ուսումնասիրեցի երևույթը և հասկացա, որ աշխարհում նման գիտարձանները շատ քիչ են, այն էլ` միայն զարգացած երկրներում: Որոշեցի, որ այդպիսին պիտի կառուցվի նաև Հայաստանում»,- իր ֆեյսբուքյան էջում մասնավորեցրել է Գայանե Կարապետյանը: Գաղափարը միս ու արյուն է ստացել Awesome Foundation Yerevan-ի կողմից ֆինանսական միջոցներ տրամադրելու շնորհիվ: Համբերատարության, ճիշտ համագործակցության, պրպտուն աշխատանքի շնորհիվ գիտարձանի ստեղծումը դարձավ իրողություն և գտավ իր մնայուն տեղը: Ու այդ ճանապարհին Գայանեին օգնության հասան ու աջակցության ձեռք մեկնեցին մի շարք կազմակերպություննե ու անհատներ, նրա ընտանիքի անդամներն ու ընկերները, որոնք հավատացին նրան, վստահեցին ու չսխալվեցին: Գայանեն խոստովանում է, որ նախագծի վրա ծախսվել է ավելի շատ ժամանակ և գումար, քան նախատեսված էր, և հույս ունի, որ խնամքով ու հոգատարությամբ կվերաբերեն գիտարձանին, և այն երկար տարիներ կծառայի իր նպատակին: Գիտարձանը բացված է, Շշնջացող ափսեներն արդեն բոլորի սեփականությունն են, իսկ ցուցանակներն այցելուներին կհուշեն` ինչպես օգտվել դրանից: Սևան համայնքը Գայանե Կարապետյանին և նրա նման երիտասարդների շնորհիվ պետք է դառնա ինքնաբավ, ուժեղ, կայացած ու ներկայանալի: Գայանեին էլ մաղթենք նորանոր հաջողություններ ու բացահայտումներ գիտության անծայրածիր աշխարհում, որոնք մի օր կրկին հանգրվանելոււ են Սևանում: |
|
|