Ովքեր սիրում են լուսանկարել և 14 տարեկանից բարձր են, Հայաստանի Համայնքների միությունը հրավիրում է մասնակցելու «Իմ համայնքը» խորագրով ֆոտոմրցույթին:
Մրցույթին մասնակցելու համար անհրաժեշտ է 2017թ-ի հոկտեմբերի 9-ից 23-ը ներառյալ photo@caa.am էլեկտրոնային հասցեին ուղարկել մինչև 5MB ծավալ ունեցող մասնագիտական կամ սիրողական մեկ լուսանկար:
Նամակում անհրաժեշտ է նշել լուսանկարի կարճ վերնագիրը, պատկերված համայնքի անունը, հեղինակի անուն-ազգանունը, տարիքը, բնակության հասցեն ու կոնտակտային հեռախոսահամարը:
Մրցույթում հաղթելու է երկու մասնակցի լուսանկար` առավելագույն թվով քվե (like) հավաքած և միության փորձագիտական հանձնաժողովի կողմից ընտրված:
Նոյեմբերի 3-ին ՀՀՄ-ի ֆեյսբուքյան էջում կտեղադրվեն քվեարկության արդյունքները, կհայտարարվեն հաղթողների անունները: Լավագույնները կստանան գրքերի հավաքածու:
Եվս 10 հոգի` ամենաշատ քվեներ հավաքած, ինչպես նաև հանձնաժողովի կողմից ամենաբարձր գնահատականին արժանացած մասնակիցները, 2018-ի գարնանը պրոֆեսիոնալ լուսանկարչի ուղեկցությամբ կայցելեն Հայաստանի մի քանի համայնքներ և կպատրաստեն համայնքային կյանքի վերաբերյալ ֆոտոշարք:
Մրցույթի պայմաններին կարող եք ծանոթանալ` այցելելով Հայաստանի Համայնքների միության ֆեյսբուքյան էջ: Բաց մի թողեք Սևանը լուսանկարների միջոցով ներկայացնելու լավագույն պահը: