Խորհրդակցության սկզբում բաժինների պետերը, վարչական ղեկավարները, և բաժինների աշխատանքներ համակարգողները ներկայացրին տրված հանձնարարականների ուղղությամբ իրականացված աշխատանքները: Աշխատանքների ներկայացումից հետո տրվեցին համապատասխան հանձնարարականներ
Հանձնարարվեց`
Ա. Ղուկասյանին`
- Ամբողջացնել և ՀՀ Գեղարքունիքի մարզպետի աշխատակազմ ներկայացնել ԼՂ-ից բռնի տեղահանված և Սևան համայնքում բնակվող անձանց պետության կողմից տրամադրված աջակցության վերաբերյալ տեղեկատվություն. - Համագործակցել վարչական ղեկավարների հետ և ներկայացնել տեղեկատվություն բնակավայրերում առկա վաճառվող գույքերի, հողատարածքների բնակարանաշինության ծրագրերի վերաբերյալ. - 2024թվականի համար ներկայացվող սուբվենցիոն հայտերն ամբողջացնել` հաշվի առնելով կատարված փոփոխությունները. - Հետևել համայնքապետարանի փաստաթղթաշրջանառությանը, գրությունների ուղարկման ժամկետներին և պատշաճ կատարմանը.
Ս. Համբարձումյանին`
- Կազմակերպել հումանիտար աջակցության գործընթացը` համագործակցելով բարեգործական կազմակերպությունների և հիմնադրամների հետ. - Աջակցության տրամադրումից հետո կազմակերպել համապատասխան փաստաթղթերի ձևակերպումները:
Ա. Հովհաննիսյանին`
- Պարբերաբար աշխատել համայնքի տարածքում գործող ուսումնական հաստատությունների տնօրենների հետ` ԼՂ-ից տեղահանված դպրոցահասակ երեխաների շարժը վերահսկելու նպատակով. - Իրականացնել հաշվառում համայնքի ՆՈՒՀ-եր հաճախող և հերթագրված արցախցի երեխաների մասով. - Ստուգիչ այցեր կազմակերպել համայնքի ՆՈՒՀ-եր, ստուգել սննդի կազմակերպման և բաշխման գործընթացը. - Պատշաճ կազմակերպել խնամակալության և հոգաբարձության աշխատանքները, տնայցերը կատարել ժամանակին.
Մ. Մկրտչյանին`
- Հետևել ընթացիկ տարում իրականացվող սուբվենցիոն ծրագրերի շինաշխատանքներին` համագործակցելով կապալառու կազմակերպությունների հետ. - Շարունակել 2024թվականին իրականացվելիք սուբվենցիոն ծրագրերի նախագծանախահաշվային փաստաթղթերի ամբողջացման գործընթացի վերաբերյալ փաստաթղթերի հավաքագրումը. - 2024թվականի համար ներկայացվող սուբվենցիոն հայտի և անհրաժեշտ փաստաթղթերի կազմման համար համագործակցել աշխատակազմի հետ. - Համայնքի ճանապարհային երթևեկության սխեմայի կազմման գործընթացը հասցնել ավարտին` ավագանու հաստատմանը ներկայացնելու համար.
Դ. Թորոսյանին`
- Համայնքում իրականացվող և իրականացվելիք ծրագրերի մասով համագործակցել տեղական և միջազգային կազմակերպությունների հետ, ներկայացնել անհրաժեշտ փաստաթղթերը և տվյալները. - Մասնակցել սուբվենցիոն հայտերի կազմման, փաստաթղթերի հավաքագրման աշխատանքներին.
Զ. Հարությունյանին`
- Համագործակցել համատիրությունների նախագահների հետ` բնակֆոնդին վերաբերող խնդիրների լուծման, համայնքի ենթակառուցվածքների բարելավման ծրագրերի իրականացման համար.
Վարչական ղեկավարներին`
- Ամենօրյա պարբերականությամբ հաշվառել և Սևանի համայնքապետարանի աշխատակազմ ներկայացնել բնակավայրերում բնակվող տեղահանված արցախցիների գրանցամատյանները, կատարել կարիքների գնահատում և ներկայացնել առկա խնդիրները. - Հետևել բնակավայրերում իրականացվող սուբվենցիոն ծրագրերի ընթացքին, գույքագրել առկա խնդիրները. - Ներկայացնել տեղեկատվություն բնակավայրերում առկա համայնքային սեփականություն հանդիսացող հողատարածքների շենք-շինությունների, մեքենասարքավորումների վերաբերյալ, դրանք ներառել նաև ՀԿՏՀ համակարգում: |